![](https://eacnews.asia/uploads/images/1965.jpg)
សម្តេចតេជោ ហ៊ុន សែន ផ្តល់ជំនួយជូនដល់ប្រទេសវៀតណាម ដើម្បីចូលរួមទប់ស្កាត់ការរីករាលដាលជំងឺកូវីដ-១៩
ភ្នំពេញ: នៅរសៀលថ្ងៃទី១៧ ខែកក្កដា ឆ្នាំ២០២១ នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានសម្រេចឧបត្ថម្ភថវិកា ២០ម៉ឺនដុល្លារ និងម៉ាសចំនួន ១លាន ១សែនម៉ាស់ ព្រមទាំងម៉ាស៊ីនផលិតអុកស៊ីសែន ១០០គ្រឿង ជូនទៅរដ្ឋាភិបាលវៀតណាម ដើម្បីរួមចំណែកដោះស្រាយការលំបាករបស់វៀតណាម ដែលកំពុងរងការរាតត្បាតដោយជំងឺកូវីដ-១៩។
ម៉ាស់ដែលផ្តល់ទៅវៀតណាមនេះ មានម៉ាស់ធម្មតាចំនួន ១លានម៉ាស់ និងម៉ាស់វេជ្ជសាស្ត្រចំនួន ១០ម៉ឺនម៉ាស់។ ក្រៅពីជួយឧបត្ថម្ភម៉ាស់និងថវិកា សម្តេចតេជោ ហ៊ុន សែន ក៏បានបន្ថែមម៉ាស៊ីនផលិតអុកស៊ីសែន ១០០គ្រឿង។
លើសពីនេះកាកបាទក្រហមកម្ពុជាដឹកនាំដោយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានជូនដំណឹងថានឹងបរិច្ចាគថវិកាចំនួន ១០ម៉ឺនដុល្លារ ដល់កាកបាទក្រហមវៀតណាមតាមរយៈស្ថានទូតវៀតណាមប្រចាំនៅកម្ពុជាដើម្បីជួយក្នុងការប្រយុទ្ធប្រឆាំងនឹងជំងឺកូវីដ-១៩។
ជាមួយគ្នានេះដែរប្រធានសមាគមមិត្តភាពកម្ពុជា - វៀតណាម លោកស្រី ម៉ែន សំអន ក៏បានប្រកាសផ្តល់ប្រាក់ចំនួន ៥ ម៉ឺនដុល្លារ ដល់សមាគមមិត្តភាពវៀតណាម - កម្ពុជា តាមរយៈស្ថានទូតវៀតណាមប្រចាំនៅកម្ពុជាដើម្បីជួយក្នុងយុទ្ធនាការបង្ការ Covid-19 របស់ខ្លួននៅប្រទេសវៀតណាម។
ប្រទេសវៀតណាមបាននិងកំពុងរងការរាតត្បាតជំងឺកូវីដ-១៩ យ៉ាងធ្ងន់ធ្ងរ ជាពិសេសនៅទីក្រុងហូជីមិញ។ រយៈពេលប៉ុន្មានថ្ងៃចុងក្រោយនេះ វៀតណាមបានរកឃើញអ្នកឆ្លងជំងឺកូវីដ-១៩ ខ្ទង់ពាន់ជារៀងរាល់ថ្ងៃ។
សូមបញ្ជាក់ថា កម្ពុជាក៏ធ្លាប់បានផ្តល់ជំនួយម៉ាស់ទៅកាន់ប្រទេសឡាវ មីយ៉ាន់ម៉ា ទីម័រ និងណេប៉ាល់ផងដែរ ដើម្បីប្រយុទ្ធប្រឆាំងនឹងជំងឺកូវីដ-១៩៕